原创周云海海上梦叠

作者：周云海

沪语改写、诵读：孙维陵

文字修正：丁迪蒙

阿弟从市郊一个农民屋里买转来一包色泽淡金、口味酸并且略微有点咸个咸菜，像觅到了宝一样，送了眼拔我，家主婆开心个囥勒冰箱里。

现在家家离勿开冰箱，啥个食物侪朝冰箱里向摆。勿光是冰鲜个鸡鸭鱼肉、冰激凌啤酒饮料，还有勿想浪费个剩菜，老早最勿值铜钿，现在像宝贝一样个酸咸菜……

所以呢，家用冰箱是越来越大，从单门个小冰箱，到冷冻冷藏分开个上下两门冰箱，发展到现在左右双开门大冰箱，有眼人屋里向甚至还用了冷冻冰柜。我屋里个冰箱立勒宽敞个厨房间里像巍峨个大厦，双开门同时拉开比房门还要阔。社会个发展，居民生活水平个提高，让我想起了年轻辰光曾经搭个姑娘个闲话。

三十五年前头，我还呒没结婚，勒南市三牌楼路浪一爿街道工厂上班。清贫年月，蜗居勒老城厢里生活搭仔工作个阿拉搿帮年轻人，勿单单谈情说爱，也谈谈人生、理想搭仔幸福。记得厂里个叫玉梅个姑娘，勒下班路浪搭我闲聊，讲结婚“买冰箱有啥用啊，冰箱里向囥点泡饭啊？”同样个街道工厂职工身份，让阿拉对未来个愿景跟生活想法趋同，有得共鸣。

岁月远逝。

有些回忆成为了今朝个笑谈趣闻。假使今朝再碰着玉梅，提起当年闲聊买冰箱有啥用个话题，我想会让阿拉笑得穿越时光，又回到了清贫个年代。冰箱勒今朝，可以储存鸡鸭鱼肉、生鲜菜蔬、食品佐料，也可以存放冷饭、咸菜个超级大个饮食百宝箱！

咸鱼翻身。咸菜也成为了宝贝。勒清贫年代，百姓个吃饭台子浪美味佳肴邪气少，咸菜搭青菜、萝卜一样，是伊个辰光百姓屋里最主要个家常菜。除脱纯炒咸菜以外，还有咸菜炒毛豆、咸菜烧豆芽、咸菜发芽豆、咸菜豆瓣酥、咸菜烧洋山芋、咸菜烤毛笋、咸菜豆瓣汤咾啥，攀搭档次高个，则有咸菜挞蛋，咸菜炒肉丝、咸菜烧乌贼鱼，咸菜大汤黄鱼咾啥……咸菜，是入味个百搭菜。

咸菜一般分雪里蕻咸菜搭仔咸白菜两种。从前，勒青菜价钿便宜个辰光，一角洋钿可以买五斤。搿辰光，阿拉石库门里有点邻居就会得自家腌白菜。青菜一棵一棵汏清爽，沥干，用只干净个矮缸，摆一坒青菜撒一层盐，再摆坒青菜、再撒层盐……等到缸里向个青菜全部摆好，腌菜个人就拿鞋子、袜子侪脱脱，脚汏清爽，赤脚勒缸里向勿停个踏，滗出菜里向个水分，最后，勒上头摆一块青石压紧、外头再罩好布。等到青菜腌熟以后，就可以随时拿出来吃了。据说，有脚癣个人踏过腌菜做出来个咸菜鲜，搿种讲法可能是因为沪语里“癣”搭“鲜”个谐音，开只玩笑个伐。以前，有句搞笑、又带有调侃味道个苏北闲话顺口溜：“家里的情况你不是不晓得，夏天吃瓜皮，冬天吃菜皮，难板难板咸菜炒肉丝。”伊个辰光最多个就是咸菜呀！

以前平头百姓屋里侪呒没冰箱个，有冰箱也勿会得拿咸菜当做宝贝去囥勒冰箱里个。

我小辰光有过桩戆事体，到现在还记得。伊日天早浪，爹爹去上班了，姆妈生病睏勒床浪，叫我到光启路菜场去买点咸菜回来，我年幼无知，用两角洋钿买转来一大捆咸菜。姆妈哭笑勿得。其实，伊个辰光个物价低，只要买几分洋钿咸菜回来就够了。

一大捆咸菜，让个无忧无虑个儿童慢慢叫个走进了烟火生活，见证了我国改革开放前后个翻天覆地个变化、发展搭仔城乡百姓生活个日益美好。

作者：周云海

朗读者：孙维陵

原标题：《咸菜囥勒冰箱里》